ന്യൂഡല്ഹി: ഡല്ഹിയിലെ പീര്ഗടി പാലത്തിന് സമീപം നിര്ത്തിയിട്ട കാറില് നിന്നും മൂന്ന് മൃതദേഹങ്ങള് കണ്ടെത്തി. ഒരു സ്ത്രീയുടെയും രണ്ട് പുരുഷന്മാരുടെയും മൃതദേഹമാണ് കാറിനുള്ളില് നിന്നും കണ്ടെത്തിയത്. പിർഗടി പാലത്തിന് മേല് നിര്ത്തിയിട്ട നിലയിലായിരുന്നു കാറുണ്ടായിരുന്നത്. സംഭവത്തില് പൊലീസ് സ്ഥലത്തെത്തി അന്വേഷണം ആരംഭിച്ചു. ആത്മഹത്യയെന്നാണ് പ്രാഥമിക നിഗമനം. കൂടുതല് തെളിവുകള്ക്കായി ഫൊറന്സിക് സംഘമെത്തി പരിശോധന നടത്തി.
രണ്ധീര്(62), ശിവ്നരേഷ്(40), ലക്ഷ്മി(40) എന്നിവരാണ് മരിച്ചത്. രണ്ധീറും ശിവ്നരേഷും റാന്ഹോള സ്വദേശികളും ലക്ഷ്മി ജഹാംഗീര്പുരി സ്വദേശിയുമാണ്. രണ്ധീരിന്റെ വെളുത്ത ടാറ്റ ടിയാഗോ കാറിനുള്ളില് നിന്നാണ് മൃതദേഹങ്ങള് കണ്ടെത്തിയത്. വിഷവസ്തുക്കള് ഉള്ളിൽച്ചെന്നായിരിക്കാം മരണമെന്നാണ് കരുതുന്നത്.
പീര്ഗടി പാലത്തിന് മുകളില് അസ്വാഭാവിക സാഹചര്യത്തില് ഒരു കാര് നിര്ത്തിയിട്ടതായി അഗ്നിശമന സേനയ്ക്ക് വിവരം ലഭിച്ചിരുന്നു. ഇതിന് പിന്നാലെ നടത്തിയ പരിശോധനയിലാണ് വാഹനത്തിനകത്ത് നിന്നും മൃതദേഹങ്ങള് കണ്ടെത്തിയത്. മൃതദേഹങ്ങളില് കാണാവുന്ന രീതിയിലുള്ള പരിക്കുകള് ഉണ്ടായിരുന്നില്ലെന്നും കാറിനുള്ളില് ഉണ്ടായിരുന്ന വിലപിടിപ്പുള്ള വസ്തുക്കള് അവിടെ തന്നെ ഉണ്ടായിരുന്നെന്നും ഉദ്യോഗസ്ഥര് പറഞ്ഞു.
Content Highlight; Three bodies were found inside a car parked near Peer Ghati Bridge in Delhi. The bodies of a woman and two men were found inside the car.